وجّهت أشهر مريضة بالمرض اللعين من بين نجوم الفن، المطربة الفلسطينيّة "ريم بنّا"، رسالة عتاب مطوّلة لصنّاع مسلسل "حلاوة الدنيا"، أكدت فيها أنّها كانت تنتظر "دعمًا معنويًّا" لمرضى السرطان، بدلًا من رسالة التخويف والترهيب السائدة، وأعلنت استمرارها في مشاهدة المسلسل أملًا في تغيّر الأحداث!!
ريم التي عانت مرض السرطان أكثر من مرة، وخضعت لجراحة عاجلة داخل إحدى المستشفيات الألمانيّة مؤخّرًا لعلاج مضاعفاته، قالت عبر حسابها الخاص بموقع الفيس بوك:
بالبداية حبّيت أحضر مسلسل "حلاوة الدنيا"، لأنّو بيحكي عن مرض السرطان .. واللي أنا مصابة فيه .. وكنت أتمنّى يطلع غير عن أيّ مسلسل تناول هالحالة ... بس للأسف .. بعد مشاهدة 6 حلقات .. خابت توقّعاتي .. أكيد راح أحضرو على أمل تتغيّر الأحداث لصالح العمل، ويعطونا قوّة وانتصارات مقنعة غير مفتعلة .. وكمان رح أتابعو عشان في ممثل بحبّو كثير .. بيستحق أدوار بطولة لأنّو هو الله خلقو فيّو صفات النجم .. "هاني عادل" أضافت: سؤال للمخرجين ولكتّاب القصص الدراميّة .. شو المحبّب إنّو تْصَدرولنا عمل درامي محشو بالشك والخوف وترهيب نفوس الناس من السرطان؟؟ يا عمي رعب الناس من الموضوع عم يوتّرنا ، إحنا مش خايفين ولا قلقانين .. إنتو ليش متوترين عنّا؟
تابعت قائلة: بعدين ليش بمعظم الحلقات بتقولوا " cancer" بالانكليزي؟ إنّو من منطق تخفيف وقْع الكلمة عالمشاهد؟ اسمو سرطاااااااااااان .. سرطااااااااان .. ضروري نقولها .. السرطان مش مرض بيعني "انتهت حياتنا" .. ولا بالضرورة مرض قاتل أو مستعصي .. السرطان بحب الخوف والضعفاء .. ليش لتعطونا إلو لقمة سايغة .. بطرح إحساس الخوف بالمسلسل ..السرطان كيف هو حكالي .. إنو خلل ببرمجة الخلايا في جسمنا .. يعني خلايانا إحنا .. بجسما إحنا .. مش مفروض نتعامل معو كإننا بحلبة مصارعة .. وأصلًا أنا ضد ينقال "بعد صراع مع مرض عضال" نحنا ما منصارع .. إحنا منحاول نرجّع الخلايا الحائرة للمسار السليم .. ومش بالضرورة "مرض عضال" لأنو صار في ما لا نهاية من العلاجات .. وفي كثير بيناتنا ناس عايشة ويمكن ما حدا بيعرف إنهن مصابين..
اختتمت رسالة العتاب بقولها: إعرفوا ... إنّو حياة الكثيرين بلّشت بعد ما مرضو .. حياتهن صار إلها معنى .. تمرّدوا عكل إشي كان مسبّبلهن التعاسة .. تحوّلوا لأشخاص أقوياء وخلّاقين رغم الوجع اللي بسبّبو العلاج .. إحنا ناس أصحّاء أكثر من أيّ حدا .. في منّا بخاف .. بس لازم نحاول نشد اللي بخاف لفوق .. للحياة .. للأمل .. للفرح .. لحتى يكمل بالرحلة .. ورجاء اهتمولنا بدور الممثل/ـة اللي عم يشتغلو دور المصاب/ـة .. لأنّو الأداء مصاب بالسطحيّة .. والسطحيّة داء محبط أكثر من السرطان .. عذرًا .. هو مجرد رأي .. وشكرًا ..
ريم بنّا أشهر فنّانة صمدت أمام طوفان المرض اللعين ..ولكن مسلسل "حلاوة الدنيا" خيّب أملها، فهل يتدارك النجمان هند صبري وظافر العابدين هذه الملاحظات ويمنحانها "جرعة أمل"؟
تابعوا أيضاً:
لمشاهدة أجمل صور المشاهير زوروا أنستغرام سيدتي
ويمكنكم متابعة آخر أخبار النجوم عبر تويتر "سيدتي فن"
